Manaʻo Wehe Na Ko
HTA Pelekikena A Luna Hoʻokele John De Fries
|
|
‘O Wākea ka i lalo, ʻo ka lā ka i luna.
Mai ke oli “ʻO Hānau Ka Lā” kēia māpuna ʻōlelo. Nui nā hana e hoʻopaʻa ai nā Hawaiʻi i ka ʻike no nā hanauna e hiki mai ana. ʻO ke oli kekahi o ia mau hana. Haku a kaʻana ʻia nā oli e hoʻopaʻa i ka ʻike no ka hānau, ka hala, ka lanakila, ka hāʻule, ka maikaʻi a me ka luʻuluʻu. He hoʻomanaʻo kēia oli no ka mana o ke ao kūlohelohe, nā kuleana pili i ia mau mana, a me ka loli o ke kau ʻoiai kākou e holomua nei i ke kau hoʻoilo.
|
|
KE KŪKULU MOʻOMEHEU HAWAIʻI |
|
Ma ka hana alu like ʻana me ka ʻAhahui Hoʻokipa ʻŌiwi Hawaiʻi (NaHHA), ua kākoʻo ʻo HTA i ka huakaʻi o ka hakulau lole kamaʻāina ʻo Micah Kamohoaliʻi i Nū Ioka no ka hāpai ʻana i ka nani o ka lole Hawaiʻi o kāna pāʻoihana, ʻo Dezigns by Kamohoaliʻi, ma ke kahua hanohano o New York Fashion Week. Ua kū haʻaheo ʻo Kamohoaliʻi no Hawaiʻi ma ka lā 9 o Kepakemapa ma Sony Hall, mālama ʻia e Runway 7. He kamaʻāina ʻo ia o Hawaiʻi Mokupuni, he mea hana kapa hanohano, a he kumu hula o Hālau Nā Kīpuʻupuʻu.
Hoʻomaikaʻi e Micah Kamohoaliʻi! Mahalo no kāu hana nui a paʻu mau i ka hoʻōla moʻomeheu a noʻeau Hawaiʻi.
|
|
KE KŪKULU WAIWAI KŪLOHELOHE |
|
Na Hawaiian Airlines ka wikiō. |
|
Paipai Ka Wikiō Hou A Hawaiian Airlines I Ka Huakaʻi Pono
Ma ka lā 13 o Kepakemapa i hoʻolele mua ai ʻo Hawaiian Airlines i kā lākou wikiō ʻelima minuke hou ʻo “Travel Pono” ma nā mokulele ma luna o ka Pākīpika, he hoʻonaʻauao i nā ʻōhua no ke ʻano e nanea palekana ai ma Hawaiʻi me ka mālama pū i ke kuleana. Hōʻike ʻia ma ka wikiō he ʻelima limahana Hawaiian Airlines, a i waena o ia mau limahana he lamakū moʻomeheu, nā lima kōkua ma ka ʻimi i nā kanaka nalowale, a me ka lima kōkua i ka mālama holoholona kai. Ma ka wikiō lākou e kaʻana ai i ka ʻike no ka holoholo palekana ma uka a ma kai, ka mālama i nā holoholona a me ke ao kūlohelohe, a me nā hana hōʻihi i ka moʻomeheu a me ke kaiāulu.
Ke hoʻolele ʻia nei ka wikiō “Travel Pono” ma ka ʻōnaehana hoʻoleʻaleʻa o ko Hawaiian Airlines mokulele kino ākea Airbus A330, a ma ka ʻōnaehana hoʻoleʻaleʻa uea ʻole no nā hāmeʻa pilikino ma ka mokulele kino hāiki Airbus A321neo.
Mahalo ʻo HTA i ko Hawaiian Airlines alakaʻi ʻana ma ka hoʻonaʻauao i nā malihini no nā hana e hōʻihi a mālama ʻia nā kamaʻāina a me ka ʻāina, no ka pono o nā kaiāulu a puni ka paeʻāina.
|
|
Hoʻonaʻauao ʻIa Nā Malihini Ma Ke Kahua Mokulele Kauʻāina ʻO Daniel K. Inouye
He māhele nui ka hoʻonaʻauao o ko HTA hana mālama ʻāina hoʻokipa. Ke hoʻolaha ʻia nei nā Travel Tips ma nā wahi ʻohi ukana o nā hale hoʻolulu ʻekahi a ʻelua o ke Kahua Mokulele Kauʻāina ʻO Daniel K. Inouye ma Oʻahu. Ma ia mau hoʻolaha ka ʻike koʻikoʻi no nā malihini, kia ma nā hana e mālama ai i ko Hawaiʻi moʻomeheu, nā mea ola, a me ka ʻano e holoholo palekana a hōʻihi ma uka a ma kai. Mahalo i ka Māhele Kahua Mokulele – Moku o Oʻahu o ka ʻOihana Alakau o ka Mokuʻāina o Hawaiʻi no ke kākoʻo i kēia mau hoʻolaha ma o ka hoʻokaʻawale ʻana i nā papakaumaka kikohoʻe.
|
|
Hana Alu Like ʻO HTUSA Me Condé Nast Traveler Me Matador No Ka Maʻiʻo Mālama Hawaiʻi
He kaʻakālai ko HTUSA no ka hana alu like ʻana me nā pakanā no ke kaʻanalike ʻana aku i nā moʻolelo no ka paipai Mālama Hawaiʻi ma nā ʻano e pā ai ka naʻau o nā malihini mālama kuleana. Ma ka hana alu like ʻana me Condé Nast Traveler me Matador, ua laha aku nei nā wikiō na HTUSA ma nā kānela kikohoʻe like ʻole, me nā moʻolelo na ia mau pāpāpaho. E paipai ʻia ana nā wikiō me nā moʻolelo ma ʻOkakopa.
|
|
Emi Ka Hoi O Ko ʻAmelika I Ka Huakaʻi Hoʻomaha Me Ke Emi O Ka Manaʻo Palekana
Ua ʻike ʻia ma kahi anamanaʻo i hoʻolaha ʻia e Destination Analysts ma Kepakemapa, ua emi ka manaʻo o ka lehulehu no ka palekana o ka holo mokulele, nā hanana i loko o ka hale, a me nā haleʻaina ma nā mahina i hala iho nei. Ua ʻike ʻia ma ke anamanaʻo, mai Iulai a i Kepakemapa, ua hāʻule ka manaʻo palekana o ka holo mokulele mai ka 51.1% a i ka 37.1%, ka palekana o nā hanana i loko o ka hale (e like me ka hale hōʻikeʻike) mai ka 59.9% a i ka 44.4%, a me ka ʻai ma ka haleʻaina mai ka 67.7% i ka 52.8%. Ma loko nō o ka hoihoi o nā ʻAmelika e huakaʻi i loko o nā mahina 12 e hiki mai ana, ua emi ka hoihoi o ka huakaʻi hoʻomaha i loko o nā mahina ʻekolu e hiki mai ana. Ma ka laulā, ua nui ka hoihoi o 71.4% o nā mea pane i ke anamanaʻo no ka huakaʻi. Ua emi naʻe ka nui o nā ʻAmelika i paʻa ka papahana e huakaʻi hōʻaumoe (52.6% mai ka 56.7% ma ʻAukake) a huakaʻi lā (43.1% mai ka 51.4% ma ʻAukake).
Mai loko mai o ka Māhele 73 o ko Destination Analysts anamanaʻo – 6 Kepakemapa 2021.
|
|
Hoʻohanohano ʻIa ʻO HTUSA Ma Ka ʻAha Nui O ASTA |
|
Ua hoʻohanohano ʻia ʻo Hawaiʻi Tourism USA, ʻo ia hoʻi ka Hawaiʻi Visitors and Convention Bureau, ʻo ia ka 2021 Domestic Destination Partner of the Year e ka American Society of Travel Advisors (ASTA) ma ko lākou ʻaha nui ma ʻAukake. ʻOiai ke kime HTUSA ma laila, ua mālama ʻia ka papa hoʻonaʻauao no 100 a ʻoi ʻelele ma ka ʻaha, mālama ʻia ke pākaukau ma ka hale hōʻikeʻike, a ua kū ʻelele no Hawaiʻi ma nā hālāwai like ʻole. Ua hui he 500 a ʻoi ʻelele no kēia ʻaha ASTA ma nā lā 23 a i ka 25 o ʻAukake ma Chicago. |
|
Hana Alu Like ʻO HTJ Me Nā Pakanā ʻOihana No Ka Hoʻolaha I Ka Manaʻo Mālama
Ua hana alu like ʻo HTJ me nā pakanā ʻoihana ma ʻAukake no ka hoʻolaha i ka manaʻo Mālama Hawaiʻi. Ua komo nā ʻoihana nui i loko o kēia hana alu like, e laʻa hoʻi me JTB, H.I.S. me KNT-CT, ma o ka hoʻolele ʻana i nā kiʻi, nā wikiō, me nā manaʻo pili iā Mālama Hawaiʻi ma nā kahua paʻa pūnaewele. Ke hoʻomau nei ʻo HTJ i nā hana alu like me nā pakanā mai mua mai kekahi.
|
|
Komo Ka Manaʻo Mālama Hawaiʻi Ma Ke Kaʻaʻōhua JCB
Ua alu like ʻo HTJ me ka pāʻoihana ea kāki kauʻāina ʻo JCB no ka paipai i nā manaʻo Mālama Hawaiʻi ma ke kaʻaʻōhua Waikīkī Trolley Pink Line, hoʻomaka ma ka lā 19 o ʻAukake.
|
|
He Kālā Kākoʻo Na Nā Lālā HTJ No Ka Polynesian Voyaging Society
|
|
He Hōʻike No Nā Kulekele A Kapu E Kū Nei I Waena O Kanakā Me ʻAmelika
Ma ka lā 9 o ʻAukake i hoʻomaka ai ʻo Kanakā e ʻae i ke komo o nā kupa o ʻAmelika i lāʻau koʻokoʻo piha ʻia, a kāpae i ke koi hoʻokaʻawale no ka poʻe a pau.
Ke aʻoaʻo naʻe nei ʻo ʻAmelika e noʻonoʻo pono nā kupa i ka holo i Kanakā no ka piʻi o ka maʻi COVID-19 i laila. Wahi a ka Centers for Disease Control and Prevention, aia ʻo Kanakā ma ka ʻanuʻu ʻekolu mai loko mai o nā ʻanuʻu he ʻehā no ka makaʻala i ka huakaʻi. ʻO ka ʻanuʻu ʻehā, he aʻoaʻo i ka huakaʻi ʻole i ia ʻāina.
Nui ka uluhua o nā Kanakā no nā kapu a ʻAmelika e mālama nei ma ka palena honua i waena o nā ʻāina ʻelua a i ka lā 21 o Keakemapa ma ka pōkole loa. Huikau ka lula a ka U.S. Department of Homeland Security , wahi a nā ʻohana ʻōʻā ʻia i waena o nā ʻāina ʻelua, no ka mea hiki nō ke lele mokulele i waena o nā ʻāina. ʻO ka holo ma ka ʻāina wale nō ka mea i pāpā ʻia.
E hāmama ana nō ka ʻaoʻao Kanakā o ka palena no nā kupa o nā ʻāina like ʻole i lāʻau koʻokoʻo piha ʻia. Kāpae pū ʻia ke koina o ka hōʻike maʻi ma ka hōʻea a ʻewalu lā ma hope. Hiki naʻe ke hōʻike kaulele ʻia ma ka hōʻea ʻana.
|
|
Komo Ka Papa Mālama A NaHHA Ma Ka Paipai ʻOihana Huakaʻi Kanakā
I waena o nā papa hou ʻeono a ka paipai hoʻonaʻauao hou no ka ʻoihana huakaʻi ma Kanakā, aia he papa na ka ʻAhahui Hoʻokipa ʻŌiwi Hawaiʻi (NaHHA) no ka waiwai o ka Mālama. Ua komo ʻīwā he 40 kanaka ma o ka Zoom a he 137 ma o ka Facebook Live, a hiki ke nānā hou ʻia ka papa e nā lālā o ka hui Spoiled Agent a i Ianuali 2022.
|
|
Hoʻomau ʻO HTO I Ka Hoʻolaha Mālama Hawaiʻi Ma Nūhōlani A Aotearoa
Ke hoʻomau nei ʻo Hawaiʻi Tourism Oceania (HTO) i ka hoʻolauna i ka manaʻo Mālama Hawaiʻi ma Nūhōlani me Aotearoa, ʻo ka nui ma ka pāpaho, e kū ana i ke kumumanaʻo hoʻokipa hoʻoulu hou e hahai ʻia nei e HTA. Ke holo maikaʻi nei kēia hana a HTO, ʻo nā manaʻo Mālama Hawaiʻi nā manaʻo holo loa ma Nūhōlani a me Aotearoa.
|
|
Kaʻana ʻO HTK I Nā Wikiō Mālama Hawaiʻi
Ua hoʻolaha aku nei ʻo Hawaiʻi Tourism Korea (HTK) i ka paipai Mālama Hawaiʻi ma o ke kaʻana ʻana aku i nā wikiō ma Instagram me Facebook. Ua hōʻike ʻia he wikiō i kēlā me kēia Pōʻakolu no ʻelima pule, ma nā kumuhana o ka mahiiʻa, ka mahiʻai, ka hoʻihoʻi ululāʻau, me ka mālama ʻāina. Ua hoʻopili ʻo HTK i ka ʻike no ka hana ma Hawaiʻi me ka ʻike laha o Kōlea, i paʻa pono ka manaʻo no ke koʻikoʻi o ka hōʻihi a mālama ke huakaʻi i Hawaiʻi.
|
|
Hana Alu Like ʻO HTK Me Everland Resort Caribbean Bay
Mai Iune a i ʻAukake, ua hana alu like ʻo HTK me ka pāka hoʻoleʻaleʻa wai ʻo Emerald Resort Caribbean Bay ma Yongin no ka paipai i nā kupa Kōlea e noʻonoʻo i ka huakaʻi i Hawaiʻi. Ua komo ʻekolu hanana kikohoʻe a kino nui i kēia paipai ʻana, me ka hoʻolaha pū i ka manaʻo Mālama Hawaiʻi ma nā wikiō me nā poke hoʻonaʻauao. Ua komo he 2,000 a ʻoi kanaka i ka hanana kikohoʻe, a ʻike ʻia ka manaʻo e 880,000 kanaka ma o ka hoʻolele ʻia i 940,000 kelepona. Ua komo he 200 a ʻoi kanaka ma ka hanana kino Aloha Photoshoot ma ka pāka, a ua komo he 10,500 i ka hoʻokūkū ma Instagram i ʻike ʻia e 100,000 kanaka.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
