Manaʻo Wehe Na Ko HTA Pelekikena
A Luna Hoʻokele John De Fries
|
|
Aloha kākou,
He wā huliau kēia no Hawaiʻi, ka ʻoihana hoʻokipa malihini, a me ke Keʻena Kuleana Hoʻokipa O Hawaiʻi. He huliau ia e hoʻoikaika ana i ka manakia pono ʻia o ka hoʻokipa malihini i kākoʻo pono ia ʻoihana i ka hoʻoulu kaiāulu a me ka hoʻoulu waiwai kamaʻāina.
I kahe pono ka hana o kēia keʻena ma loko o kēia huliau, ua hoʻonohonoho hou ʻia ke kino o HTA i mea e hoʻoholomua ʻia ka nuʻukia ʻo “Mālama Kuʻu Home” me ka pūlama i ka manaʻo o ka hoʻokipa hoʻoulu hou.
Ma kēia hoʻonohonoho hou ʻana, ua hoʻokumu ʻia nā hui limahana laulawelawe i loko o ke keʻena. Na ia mau hui laulawelawe e hoʻokō i nā pahuhopu o ka Papahana Hoʻokele 2020-2025, a luʻu i loko o ka hana mālama ʻāina hoʻokipa, e like me ka ʻimi hoʻoponopono i nā hopena o ka mākaʻikaʻi malihini ma ke kaiāulu.
Makemake pū au e hāpai i nā kūlana hana hou o Kalani Kaʻanāʻanā, ʻo ia ka Luna Alowelo, lāua ʻo Caroline Anderson, ʻo ia ka Luna Hoʻolālā. He mau kūlana hana hou loa kēia e kia ana i ka hoʻokō i nā kūkulu ʻehā o ka Papahana Hoʻokele 2020-2025 – Waiwai Kūlohelohe, Moʻomeheu Hawaiʻi, Kaiāulu, a Hokona Alowelo.
Nui koʻu mahalo i kou kākoʻo iā Kalani lāua ʻo Caroline ma ka hoʻokō i kēia mau kuleana koʻikoʻi no ke keʻena.
Mau nō ke kia o kēia keʻena i ka ʻimi hoʻoponopono i nā hihia o ka mākaʻikaʻi malihini me nā kaiāulu. He hana alu like kēia ʻimi hoʻoponopono i waena o ke keʻena nei, nā ʻelele aupuni, nā keʻena kalana, mokuʻāina, a pekelala, a me nā keʻena hoʻokipa malihini o nā mokupuni ma o nā Papahana Mālama ʻĀina Hoʻokipa.
Na HTA i alakaʻi i kēia pāhana hoʻolālā, kahi i komo ai nā ʻelele aupuni, kaiāulu, ʻoihana, a kamaʻāina no ka hōʻike manaʻo a hāpai hoʻoponopono. Me ia mau manaʻo i hōʻike a hāpai ʻia mākou e ʻimi nei i ka hoʻokaulike ʻana i ka ʻoihana hoʻokipa ma kēlā me kēia mokupuni ma luna o ke kumu hoʻokipa hoʻoulu hou.
Ua hua mai nō nā hua o ka Papahana Mālama ʻĀina Hoʻokipa a ʻike ʻia ka hoʻoholomua a HTA, nā keʻena hoʻokipa mokupuni, a me nā kalana.
Ua hāpai ʻia ka Papahana Mālama ʻĀina Hoʻokipa Oʻahu i ka papa alakaʻi HTA ma hālāwai o ka lā 29 o Iulai.
ʻO ka hoʻonaʻauao i nā malihini, ma mua a ma hope o ka hōʻea ʻana i ka ʻāina nei, ʻo ia ka piko o ko mākou hana mālama ʻāina hoʻokipa.
Kāhāhā mākou i ka ʻike i ka lawena kūpono ʻole o nā malihini i nā sila a me nā honu, he mau holoholona kiaʻi ʻia e ke kānāwai. ʻAʻole loa e ʻae ʻia kēia ʻano hana!
E hoʻomanaʻo mau kākou, kūpono ke kaʻawale he 10 kapuaʻi mai nā honu ma ka ʻāina a ma ke kai, 50 kapuaʻi mai nā sila, 50 ʻīā mai nā naiʻa a 100 ʻīā mai nā koholā. Ua kaʻana ʻia kēia wikiō hoʻonaʻauao ma ko HTA Facebook a Instagram. Paipai mākou i ke kaʻanalike ʻana i kēia wikiō me nā hoa hana, nā malihini, ka ʻohana, a me nā hoa.
Mahalo no kou heluhelu ʻana i kēia leka uila no ko HTA mau hana hoʻoikaika i ka manakia ʻāina hoʻokipa, a me nā ala e hoʻoikaika ai ka hoʻokipa hoʻoulu hou iā Hawaiʻi no nā hanauna e hiki mai ana. ʻAʻohe kākaʻikahi o ka hana e hana ʻia, a ʻaʻohe pau o kuʻu mahalo a aloha iā ʻoukou pākahi no ke kākoʻo ʻana mai.
Imua!
|
|
Hilo i ka ua Kanilehua. (ʻŌlelo Noʻeau #1000)
He ua kaulana ke Kanilehua no Hilo. Hāpai mau ʻia ka inoa no ka hoʻohanohano iā Hilo ma nā oli a ma nā mele.
|
|
KE KŪKULU MOʻOMEHEU HAWAIʻI |
|
Ka Hoʻolauleʻa Mele Manaka
I kēlā me kēia kupulau mai ka makahiki 1964 a hiki mai i kēia, mālama ʻia ka hoʻolauleʻa Mele Manaka ma Hilo ma Hawaiʻi Mokupuni, he ʻaha kupaianaha nō e hāpai ana i ka nani o ka moʻomeheu Hawaiʻi a me ka ʻoi kelakela o ke ao hula. ʻO ka maʻamau, he hanana nui kēia e kipa ai nā kini a lehu kamaʻāina a malihini pū kekahi. Ma muli o ka maʻi ahulau e holo nei, ua mālama ʻia ka hoʻokūkū hula me ka ʻole o ke anaina nānā kino.
Ua ʻākoakoa nā hālau hula mai ʻō a ʻō ma ka Hale Edith Kanakaʻole no ka hula kahiko a ʻauana i mua o nā luna loiloi wale nō, ʻaʻohe anaina nānā ma nā noho. Ma loko nō o ka nele i ka ʻole o ke kakani wawā o ke anaina, ua kau kehakeha ka hula i luna o kona kahua kilakila.
Na Hawaiʻi News Now i hoʻopaʻa a hoʻolele i ka hoʻolauleʻa, hōʻike ʻia ma KFVE a ma ka pūnaewele puni honua ma nā lā 1, 2 a 3 o Iulai. No ka nānā hou i ka hoʻokūkū, e kele aku iā www.hawaiinewsnow.com/merriemonarch.
Nui ko mākou haʻaheo i ke kākoʻo i kēia hoʻolauleʻa koʻikoʻi ma ka hāpai i ka nani o ka moʻomeheu Hawaiʻi. Hoʻomaikaʻi i ka poʻe a pau i komo i ka hoʻolauleʻa!
|
|
KE KŪKULU WAIWAI KŪLOHELOHE |
|
Hoʻoikaika ʻIa Ka Nani O Ka Hale Aliʻi ʻO ʻIolani
I kēlā makahiki aku nei, ua ʻike ʻia ka ulu ʻana o ka lāhui nalomeli i loko o nā paia o ka Hale Aliʻi ʻO ʻIolani, a me ka pono e hoʻoponopono ʻia ka hale poni mōʻī, he mau pāhana e pono ai ka mālama pono i ko kākou hale aliʻi aloha.
Ma ka lohe ʻana no kēia mau pāhana koʻikoʻi, ua ʻimi ʻo HTA i ka hana alu like me The Friends of ʻIolani Palace no ka hoʻolako i ke kālā e pono ai ka hoʻoponopono i ka paia o ka hale aliʻi a me ka hale poni mōʻī.
Ma ka hoʻokō ʻana i ia pāhana, ua wehe ʻia kekahi mau ʻāpana o ka paia ʻo waho o ka hale aliʻi, wehe i nā pūnana meli, hoʻomaʻemaʻe a hoʻoponopono i ka paia, a pena hou i hoʻi kona nani.
Ua nui ka hana hoʻoponopono i ka hale poni mōʻī, keu aku ke kīmeki heheleleʻi a me ka lāʻau popopo. Ua hoʻoponopono ʻia ka hale poni mōʻī me ke kīmeki hou ma kahi nāwaliwali, kuapo ʻia ka lāʻau popopo me ka lāʻau hou, a pena hou ia ka hale.
He pāhana kēia e hōʻoia ana i ka palekana o ke kipa i ka Hale Aliʻi ʻO ʻIolani, a me ka hiki ke hoʻohana i ka hale poni mōʻī. Ma nā makahiki ma mua o ka pilikia o ia hale poni mōʻī, ua hoʻohana ʻia no nā hanana aupuni, nā haʻiʻōlelo kūikawā, nā ʻaha male, a me nā ʻaha mele a ka Royal Hawaiian Band.
Nui ko mākou pīhoihoi no ka ʻike i nā hanana kūikawā ma nā makahiki e hiki mai ana.
|
|
Hawai‘i Visitors and Convention Bureau |
|
ʻImi ʻo Mālama Hawaiʻi I Ka Hoʻonaʻauao Malihini Ma Mua A Ma Hope O Ka Hōʻea
Ke ʻimi ʻia nei ka hoʻonaʻauao i nā malihini no ke ʻano makaʻala e kipa ai iā Hawaiʻi ma o ka papahana paipai ʻo Mālama Hawaiʻi, hoʻomaka ʻia ma Mei a hoʻomau ana i kēia mahina.
He hōʻike kēia papahana paipai i nā kamaʻāina e moʻolelo mai ana no ke koʻikoʻi o ka mālama i ka ʻāina a me ke kai. Hōʻike ʻia nā moʻolelo ma ka pūnaewele ma Facebook a Instagram, a ua ʻike ʻia nā moʻolelo he 22 miliona manawa a hiki i kēia. He kono kēia papahana paipai e mākaʻikaʻi me ka makaʻala, a hoʻihoʻi iā Hawaiʻi ma ka hana manawaleʻa me nā pakanā kaiāulu a pakanā ʻoihana he 100 a ʻoi. Ma o ia hana manawaleʻa e hohonu aʻe ai ka huakaʻi i Hawaiʻi.
ʻO Ka Mākaʻikaʻi Ka Hana Nui O Kēia Kauwela
Wahi a ka nīnauele “COVID Tracker – Vaccination Status of U.S. Travelers” a Destination Analysts i hana aku nei, hoihoi he ʻekolu hapahā o ko ʻAmelika i ka huakaʻi hele i loko o nā mahina ʻekolu e hiki mai ana. E huakaʻi ana 15.3% no kekahi kuleana hana, a e huakaʻi ana 7.5% no kekahi ʻaha a hālāwai. Ke ulu aʻe nei ka hoihoi o ka poʻe i ka huakaʻi hele no ka laha ʻana o ka lāʻau koʻokoʻo a me ka hoʻonoa ʻia o nā kapu holoholo.
|
|
Hāpai ʻIa Nā Hoʻolauleʻa Kamehameha A Mele Manaka
No ka hoʻonaʻauao i ke koʻikoʻi a hoʻoulu i ka mahalo no nā hoʻolauleʻa Kamehameha a me ka Mele Manaka ma Iāpana, ua hoʻolaha ʻo Hawaiʻi Tourism Japan i ʻelua poke nūhou i hua mai ai he 70 moʻolelo nūhou ma nā nūpepa a kahua hoʻolele nūhou, e like me Nikkei MJ me Aloha Express.
Ua lele pū nā moʻolelo nūhou pili i ka laha o ka lāʻau koʻokoʻo ma Hawaiʻi, ka hoʻonoa ʻia o nā kapu holoholo, a me ka mālama ʻāina a nā ʻahahui kamaʻāina ma Iune ma ʻeiwa polokalamu kīwī, e like me TV Tokyo me Yomiuri TV. Ua kōkua ʻo HTJ ma ka hoʻolele ʻana i ia mau moʻolelo, a me ka hoʻopaʻa i ka nīnauele me ka Pelekikena a Luna Hoʻokele HTA John De Fries ma “Saturday Station” ma TV Asahi. Ma laila ʻo ia kūkākūkā ai no ka ʻimi i ka hoʻokipa hoʻoulu hou. Ua nīnauele pū ʻia ko HTJ alakaʻi Mitsue Varley no ka papahana Mālama Hawaiʻi ma ko NHK Chikyu Radio.
Ke Kākoʻo I Nā ʻAhahui Kaiāulu
Ma luna aʻe o ke kōkua kaʻaʻike, e hāpai a hoʻokaʻaʻike ana ʻo HTJ i ka hana nui a nā ʻahahui kaiāulu ma Hawaiʻi ma Iune. Ma nā hoʻolaha like ʻole a HTJ i hoʻouna ai i 3.3 miliona kanaka ma Iāpana, ua hāpai ʻia ka hana a ka Friends of ʻIolani Palace, ka hoʻolauleʻa Kamehameha, a me ka Hoʻolauleʻa Mele Manaka.
|
|
Komo He 270 Lālā O Ka Papahana Aloha I Ka Hoʻonaʻauao Kikohoʻe
ʻOiai ka ʻoihana mākaʻikaʻi ma Iāpana e kali ana no ka hoʻonoa ʻia o nā kapu holoholo, ua paʻu mau ʻo HTJ i ka hana hoʻonaʻauao i nā lālā o ka Papahana Aloha. Ua mālama ʻia ʻelua papa ma ka lā 2 o Iune no ka hoʻolauleʻa Kamehameha a me ka moʻolelo Hōkūleʻa. Ua komo he 270 lālā o ka papahana i ia hui hoʻonaʻauao.
He māhele nui o kēia papahana hoʻonaʻauao ka hāpai i 38 kumuhana ma ke kahua paʻa pūnaewele HTJ, e laʻa hoʻi me ka mākaʻikaʻi hoʻonaʻauao, a me no Hawaiʻi ʻimi ʻana i nā pahuhopu Sustainable Development Goals ma o ke Koi Aloha+. He māhele kēia o ko HTJ ʻimi mau i ka hoʻonaʻauao malihini ma mua o ka hōʻea ʻana i Hawaiʻi.
|
|
Pau Ke Kapu Hoʻokaʻawale No Nā Kupa Kanakā I Lāʻau Koʻokoʻo ʻIa
Ma ka lā 5 o Iulai i pau ai ke kapu hoʻokaʻawale 14 lā no nā kupa Kanakā e hoʻi ana i Kanakā. No ka hōʻalo i ke kapu hoʻokaʻawale, pono e pau ʻelua kui ʻana o ka lāʻau koʻokoʻo i ʻāpono ʻia e Kanakā, hōʻike i ka ʻole o ka maʻi COVID-19 he 72 hola ma mua o ka hōʻea ʻana, hōʻike hou i ka ʻole o ka maʻi ke hōʻea, a paʻa kahi noho kaʻawale inā ʻike ʻia ka maʻi ma ka hōʻea ʻana i Kanakā.
|
|
Hoʻonui Ana ʻO WestJet I Ka Lele ʻAna I Hawaiʻi
E hoʻoulu nui ana ʻo WestJet i ka lele ʻana i Hawaiʻi ma nā mokulele Dreamliner mai ka ʻaoʻao komohana o Kanakā i Maui, a me ka hoʻokumu i nā mokulele holo pololei mai Calgary a i Kona me Līhuʻe i kēia kau hoʻoilo. Lele ʻo WestJet i 57 mokulele o ka pule ma 10 ala i waena o Kanakā me Hawaiʻi.
|
|
E Mau Ka Moemoeā
Ma loko nō o ke kapu holoholo i waena o nā mokupuni Pākīpika me Hawaiʻi ma muli o ka maʻi ahulau, hoʻomau ʻo Hawaiʻi Tourism Oceania i ka hoʻokaʻaʻike me nā hoa he 150,000+ ma ka pūnaewele. Ke hōʻike nei ʻo HTO i nā kiʻi me nā moʻolelo e hōʻike ana i ka nani o ka ʻāina, ke ao kūlohelohe, a me ka moʻomeheu – nā kumu e aloha nui ʻia ʻo Hawaiʻi e ko Nūhōlani me Aotearoa. ʻO ka mākia e hāpai nui ʻia nei, ʻo ia ʻo #DreamingOfHawaii.
|
|
Hōʻea Ka World Vintage Rugby Carnival i Hawaiʻi ma Mei 2022
No ka poʻe kamaʻāina ʻole i ka Rugby Union a me nā lula o ka haʻuki, he waiwai paha ka hoʻokamaʻāina. E hōʻea ana he 1,000 ʻālapa a kākoʻo i Hawaiʻi i kēia makahiki aʻe.
E mālama ʻia ana ka World Vintage Rugby Carnival ma Oʻahu mai ka lā 15-22 o Mei, 2022 me nā huakaʻi i nā mokupuni ʻē aʻe ma mua a ma hope o ia hanana. No ʻAmelika a me nā mokupuni Pākīpika ka nui o nā kime e komo ana, me ke komo pū o nā kime no Hawaiʻi kekahi. Mālama ʻia kēia hanana e Golden Oldies Sports & Events.
He hōʻea mai koe o ka ʻikepili hou i kēia makahiki.
|
|
No Ka Lele Mokulele
I kēia Kepakemapa, e hoʻolele ana ʻo Korean Air lāua ʻo Asiana Airlines i ʻelua mokulele hoʻolimalima pākahi – he 1,400 noho ka huinanui – i waena o Incheon me Honolulu ma ke kau Chuseok, he lā nui i kapa ʻia ʻo Hangawi e kekahi. Hoʻolauleʻa ʻia ka māhuahua o ka ʻai ma ka lā 15 o ka mahina 8 o ka ʻalemanaka mahina. Mau nō ka hana a HTK me ia mau hui mokulele ʻelua no ka hoʻihoʻi i nā mokulele maʻamau i Hawaiʻi i kēia makahiki.
Ka Hana Malihini
Ma ka hana alu like me Caribbean Bay, ka pāka wai nui loa ma Kōlea, ke hoʻolaha nei ʻo HTK i ka papahana paipai Mālama Hawaiʻi. Ma loko o ia hana alu like ʻana, ke kia nei ka hoʻonaʻauao i nā malihini hoihoi i ka mākaʻikaʻi ao kūlohelohe e kipa ana iā Caribbean Bay. Ke hōʻike ʻia nei nā pelaha me ka ʻike Mālama Hawaiʻi, me nā loulou i nā wikiō Mālama Hawaiʻi. Ke mālama pū ʻia nei ka hoʻokūkū ma ka pāka a ma ke kahua paʻa pūnaewele kekahi. He huakaʻi i Hawaiʻi ka makana nui loa, kākoʻo ʻia e Ala Moana Hotel by Mantra.
|
|
Me Ka Mahalo A Ka ʻOhana HTA |
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
